Luke 20

Ukuthandabuza Ngamandla KaJesu

1Ngelinye ilanga kwathi efundisa abantu ethempelini, etshumayela ivangeli, abaphristi abakhulu labafundisi bomthetho, kanye labadala, beza kuye.

2Bathi, “Ake usitshele ukuthi uwathatha ngaphi amandla okwenza izinto lezi. Ngubani okunike amandla la?”

3Waphendula wathi, “Lami ngizalibuza umbuzo. Ngitshelani, 4ukubhaphathiza kukaJohane – kwakuvela ezulwini na, loba ebantwini?”

5Bahlanganisa amakhanda bathi, “Singathi, ‘Kwakuvela ezulwini,’ uzabuza athi, ‘Kungani lingazange limkholwe na?’ 6Kodwa singathi, ‘Kwakuvela ebantwini,’ abantu bonke bazasikhanda ngamatshe, ngoba baqinisa ukuthi uJohane wayengumphrofethi.”

7Ngakho baphendula bathi, “Kasikwazi ukuthi kwakuvela ngaphi.”

8UJesu wathi, “Lami kangizukulitshela ukuthi lezizinto ngizenza ngamandla bani.”

Umzekeliso Wabalimi Besivini

9Waseqhubeka ngokutshela abantu umzekeliso lo: “Indoda yahlanyela isivini, yasiqatshisa abaye abalimi, yasihamba okwesikhathi eside. 10Ngesikhathi sokuvuna yathuma inceku yayo kubaqatshi besivini ukuze bamuphe ingxenye yezithelo zesivini. Kodwa abalimi bayitshaya bayixotsha ingelalutho. 11Yathuma enye inceku, kodwa laleyo bayitshaya bayiphatha kabuhlungu, bayixotsha ingaphathanga lutho. 12Wajinge wathuma eyesithathu, bayilimaza bayiphosela ngaphandle.

13“Umnini wesivini wasesithi, ‘Ngenzeni? Ngizathuma indodana engiyithandayo; mhlawumbe bazayihlonipha.’

14“Kodwa kwathi abaqatshi besivini beyibona bahlanganisa amakhanda ngaleyondaba. Bathi, ‘Lo yindlalifa. Kasiyibulale, ilifa libe ngelethu.’

15Base beyisusela ngaphandle kwesivini bayibulala. “Kambe umninisivini uzabathini? 16Uzakuza afike ababulale labo baqatshi besivini, isivini leso asinike abanye abalimi.” Abantu bathi bekuzwa lokhu bathi, “Sengathi kungaze kwafa kwenzeka lokhu!”

17UJesu wabakhangela nta wabuza wathi, “Pho kutshoni lokho okubhalwe ukuthi: ‘Ilitshe abalilahlileyo abakhi seliyisiqokoqela segumbi?’

18Wonke owela phezu kwalelolitshe uzachobozeka izicucu, kodwa lowo eliwela phezu kwakhe uzahlifizwa.”

19Abafundisi bomthetho labaphristi abakhulu badinga indlela yokumbopha masinyane ngokuba babesazi ukuthi wakhuluma umzekeliso lo eqonde bona. Kodwa babesesaba abantu.

Ukuthela kuKhesari

20Ukuze bamqaphelisise bamthumela izinhloli ezazizitshaya abathembekileyo. Babefisa ukumbamba uJesu kokunye ayengakukhuluma ukuze bamedlulisele emandleni ombusi.

21Ngakho izinhloli zambuza zathi, “Mfundisi, siyazi ukuthi wena ukhuluma njalo ufundisa okuqondileyo, lokuthi kawubandlululi kodwa ufundisa indlela kaNkulunkulu mayelana leqiniso.

22Kufanele yini ukuthi sibhadale imithelo kuKhesari na, loba hatshi?”

23Wabubona ubuqili babo wathi kubo,

24“Ngitshengisani idenariyu. Kulomfanekiso kabani lombhalo kabani kuyo?”

25Baphendula bathi, “NgokaKhesari.” Wathi kubo, “Pho nikani uKhesari okungokukaKhesari, linike uNkulunkulu okungokukaNkulunkulu.”

26Behluleka ukumbamba ngalokho akutshoyo lapho obala. Sebemangaliswe yimpendulo yakhe bathula zwi.

Ukuvuka Kwabafileyo Lokwendiselana

27Abanye abaSadusi abathi kakukho ukuvuka kwabafileyo beza kuJesu belombuzo. 28Bathi, “Mfundisi, uMosi wasibhalela ukuthi nxa umfowabo wendoda angafa atshiye umfazi kodwa bengalabantwana indoda leyo kumele imngene umfelokazi ukuze izalele umfowabo abantwana.

29Pho kwakukhona abafowabo abayisikhombisa. Owokuqala wathatha umfazi kodwa wafa engalamntwana.

30Owesibili 31njalo lowesithathu laye bamthatha, kwathi bonke bosikhombisa benza njalo bafa bengatshiyanga bantwana. 32Ekucineni umfazi laye wafa. 33Pho-ke, ekuvukeni kwabafileyo uzakuba ngumfazi wawuphi njengoba bonke bosikhombisa babemthethe?”

34UJesu waphendula wathi, “Abantu balesi isikhathi bayathatha njalo bayendiswa. 35Kodwa labo abazabe befanele ukuba lengxenye kulesosikhathi lasekuvukeni kwabafileyo kabazukuthatha loba bendiswe, 36njalo kabasayikufa; ngoba sebenjengezingilosi. Bangabantwana bakaNkulunkulu, ngokuba bengabantwana bokuvuka kwabafileyo. 37Kodwa lasemilandweni wesixuku, laye uMosi wabonisa ukuthi abafileyo bayavuka, ngokuba iNkosi uyibiza ngokuthi ‘uNkulunkulu ka-Abhrahama, loNkulunkulu ka-Isaka, njalo uNkulunkulu kaJakhobe.’ 38Kasuye uNkulunkulu wabafileyo, kodwa ngowabaphilayo, ngoba kuye bonke bayaphila.”

39Baphendula abanye abafundisi bomthetho bathi, “Utsho kuhle, Mfundisi!” 40Kasabanga khona owaba lesibindi sokumbuza eminye imibuzo.

UKhristu UyiNdodana Kabani na?

41UJesu wasesithi kubo, “Kungani besithi uKhristu uyiNdodana kaDavida na? 42UDavida yena ngokwakhe uyakufakaza eNcwadini yamaHubo uthi: ‘INkosi yathi eNkosini yami: Hlala ngakwesokunene sami,

43ngize ngenze izitha zakho isigcabha sezinyawo zakho.’ 44UDavida umbiza athi ‘Nkosi.’ Pho angaba yindodana yakhe njani?”

45Kwathi bonke abantu besizwa uJesu wathi kubafundi bakhe,

46“Limukani abafundisi bomthetho. Bathanda ukuhambahamba becece ngezigqoko ezinde eziphephezelayo njalo bathanda ukubingelelwa emisikeni, futhi bathanda izihlalo eziqakathekileyo emasinagogeni lezindawo zabahlonitshwa emadilini. 47Bayahuquluza ezindlini zabafelokazi, njalo bazitshengisele ngokwenza imithandazo emide. Abantu abanjalo bazajeziswa okwesabekayo.”